An thuchhuahin a tarlan danin, Assam lam hian an Police te awlsam leh nuam zawka an inkalpawh zung zung theih nan Vairengte Sabual muala Pu Phirthanga leilet leh Pu J. Samuela huanah JCB/Hitachi hmangin kawng an rawn lai thar nasa hle tih hmuhchhuah a ni, an ti.

July 29, 2024 a Home minister-in thuthar thehdarhtute hmaah, ‘Kan sorkar hnuah ramri-ah status quo bawhchhiatna thar a la awm lo niin kan hria,' tia a sawi hi pawi kan tiin, Vairengte mipuite kan rilru a na hle a ni. Mizoram Home minister-in thuthar thehdarhtute hmaa status quo chhungah hma thar lakna a awm lo a tih hi July 29, 2024 ah ngei pawh khan Assam sorkar hian Vairengte Aitlangah kawng a la lai reng a ni tih Home minister hian a hre lo der nge, Mizoram sorkar hriat ruk puiin Assam sorkar hian kawng an lai, tih hi MNF Serlui North Block te chuan kan zawhna a ni, an ti a.

“Kan Home minister hian Zoram mipui hmaah dawt chiang taka a sawi avangin, ngaihdam dil turin kan phut a ni. Ramri venhim leh thuam chak turin kan sorkar hian a rang lama hma la a, Assam sorkar in status quo chhunga an hmalakna hi tihtawp tir nghal turin kan ngen nghal bawk a ni,” an ti.

“Kan ram an laihchhiat vek tawh hnu a, August ni 9-10, 2024 a Mizoram sorkar leh Assam sorkar te Home secretary level-a remna kawng zawnga inbiak an la tum chauh hi kan sorkarin ramri a vei tawklohzia leh ralkhat atang chauh a ramri vei sorkar an nihzia a lantir,” an ti bawk.

MNF sorkar anga huaisen taka ramri humhalh a, hmala turin ZPM sorkar kan ngen a, kuthnathawktute harsatna hrethiamtu mipui sorkar ni a an insawi ang ngeiin a taka chechhuak turin kan ngen nghal bawk, tiin an thuchhuah ah tarlan a ni.